Deputeti Belind Këlliçi tha pasditen e sotme se nuk ka asnjë ndryshim të Partisë Demokratike lidhur me procesin e zgjedhjes së Presidentit të ri.
Këlliçi tha se risia nga mbledhja e sotme është se gjithçka është transparente.
“Asnjë mbledhje pa kuorum dhe pa transparencë nuk i shërben bashkimit të demokratëve, përkundrazi tentativa që bëhen për të mbledhur forume pa transparencë dhe kuorum i shërbejnë përçarjes së PD”, tha Këlliçi. Sipas tij, Enkelejd Alibeaj është marrë peng nga Taulant Balla, por ai s´ka asnjë tagër për të përfaqësuar PD në negociatat me PS për Presidentin e ri.
Ai tha se PD nuk do të pranojë farsën që Partia Socialiste po zhvillon me atë që e konsideron si gjoja proces negociatash për zgjedhjen e Kreut të Shtetit përmes zarfave të mbyllur.
“Se çfarë dëshiron PS është çështje e tyre. Ne do të kontaktojmë edhe me partitë aleate lidhur me këtë proces, sikundër mund tju them se Enkelejd Alibeaj nuk ka asnjë tagër për të zhvilluar negociata”, tha Këlliçi.
Pjesë nga deklarata e Këlliçit
“Të diskutojmë kë njeh Rama për negociator nga ana e PD, tregon se sa ka degraduar pushteti dhe ato individë që i shërbejnë kauzës së Edi Ramës.
Alibeaj s’është i mandatuar nga grupi parlamentar i PD dhe asnjë forum i lartë i PD për të negociuar në emër të PD për Presidentin.
Alibeaj mund të flasë në kapacitetin e tij individual, por që të përfaqësojë siglën e PD dhe vullnetin e demorkatëve e opozitarëve, s’e ka mandatuar askush.
Koha kur Rama e Balla përcaktonin qoftë linjën politike të PD apo me kë negocionin në PD ka marrë fund. Alibeaj ka degraduar politikisht deri në këtë pikë.
Alibeaj është ministër i Ramës për marrëdhëniet me PD se sa është kryetar i shkarkuar i grupit parlamentar të PD. Kjo çështje i përket demokratëve. Ai është shkarkuar më 30 prill nga kreu i grupit.
I takon Rithemelimit për të përcaktuar një komision që do negociojë me qeverinë për çështjen e Presidentit.”-tha Këlliçi.
