Trajneri Jurgen Klopp paralajmëron Liverpulin se sulmi i Totenhemit, do t’u krijojë atyre një shqetësim që se kanë përjetuar prej një kohe të gjatë. Sipas gjermanit, “Spurs” kanë disa prej futbollistëve më të mirë në botë në fazën kundërsulmuese.
“Test mjaft i vështirë për ne, nisur nga situata. Secili ekip lufton për gjithçka, por sigurisht që Totenhemi ka mjaft cilësi. Kur luajnë në transfertë, ata nuk shqetësohen shumë nëse nuk e mbajnë topin nën kontroll. Mbrojnë në mënyrë kompakte e sigurisht kanë mjaft cilësi në kundërsulm. Kjo është e vërteta, duhet të gjejmë një zgjidhje për këtë”.
Ndërsa trajneri i Totenhemit, Antonio Conte e di se skuadra e tij do të ketë një sfidë të vështirë në “Enfield”.
“E dimë se është një moment mjaft i vështirë të përballemi kundër Liverpulit, sepse ata po kalojnë një formë mjaft të mirë. Duhet të tregohemi të zotë kur kemi topin. Jemi përmirësuar, e mendoj se mund të marrim tri pikët. Na duhen pikë për një vend në Champions”.
Totenhemi është në vend të pestë në renditjen e Premier Ligës, dy pikë më pak se sa Arsenali që aktualisht e ka një vend në Ligën e Kampioneve. /Klan News/
