Fatbardh Kadilli u shpreh mbrëmjen e sotme në emisionin “Zonë e Lirë” se nuk do të garojë për kreun e PD, në zgjedhjet e 22 majit.
Kadilli tha se arsyeja është e thjeshtë: kemi disa njerëz që i rendit nga pas Berishës dhe këtu nuk mund të flitet për garë.
“Partia është e përçarë, nuk jam i asaj që thuhet se vota sjell bashkimin, pasi vota po thellon çarjen. Mjafton të shikoni retorikën, deklaratat dhe akuzat. Partia është në një konflikt, kemi një bazë partie e cila nuk u bë pjesë e asnjë procesi. Kemi një grup parlamentar që nuk po bën aspak politikë. Më saktë në zgjedhjet e 6 marsit mësuam se ka 3 pjesë: një që mbështeti Berishën, një kandidatët e Bashës dhe një e tretë që qëndroi në shtëpi, pra nuk votoi.
Në 22 maj kemi zgjedhjen e kryetarit, por nuk është garë e vërtetë, pasi rrjeshti është i Berishës. Nuk mund të bësh as ballafaqim politik. Berisha u nxitua me procesin, e bëri shumë shpejt të gjithë procesin zgjedhor, madje më shpejt edhe se Basha në garën e qershorit 2021”, tha Kadilli.
Ai tha se Basha deklaronte se kishte mbështetjen e 82 apo 90 % të partisë, por sot nuk bën dot bashkë as 82 vetë. “Shikoni sondazhet, janë 90 % e shqiptarëve që nuk e mbështesin”, tha ai.
