Ministria e Brendshme fshihet pas hetimit për vdekjen e 31-vjeçarit Ilvi Meta në komisariatin Policisë së Kavajës, ashtu siç ka bërë pas çdo ngjarje të rëndë.
Zv/ministri i Brendshëm Andi Mahila u mbrojt me fjalinë “çështja është në hetim” kur në Vlorë u pyet për rastin e përsëritur të vdekjeve në duart e uniformave blu.
“Kjo është një çështje në hetim, dhe kur është në hetim pritet të dalin rezultatet. Ajo që di të them është strukturat e varësisë së Ministrisë së Brendshme, dhe Agjencia e Mbikëqyrjes Policore kanë vepruar në mënyrë të menjëhershme për të nisur hetimet. Kanë dalë vlerësimet paraprake, të presim deri në fund…”, tha Mahila në një prononcim për gazetarët nga Vlora.
31-vjeçari Ilvi Meta, sipas hetimeve paraprake, i dhe fund jetës në qelinë e komisariatit Kavajë duke u vetëvarur me lidhësen e kapuçit të trikos që mbante veshur.
Por familjarët e të riut nuk e besojnë vetëvrasjen, duke thënë se “ai u ngeli në dorë efektive të policisë”.
Për ngjarjen në pranga u vunë Policët Bexhet Berberi dhe Rushit Kola, si edhe oficeri i rojës Petrit Brahimaj, për të cilët prokuroria ka kërkuar nga gjykata “arrest me burg”, ndërsa ditën e nesërme do të zhvillohet seanca për masën e sigurisë.
Ata dyshohen se kanë neglizhuar procedurat standarde duke mos i hequr bluzës që 31-vjeçari mbante veshur lidhësen me të cilën ai dyshohet se u vetëvar.
Në vijim tre efektivët do të dalin para gjykatës së Kavajës, dhe prokuroria mësohet se ka kërkuar mbajtjen në burg për vdekjen në qeli.
