Lëvizjet në drejtim të kundët të palëve të venmdosura në llogore tashmë brenda PD thellojnë më tej përçarjen. Kështu, Enkelejd Alibeaj ka thirrur sot mbledhjen e grupit parlamentar të PD për të diskutuar mbi çështjen e zgjedhjes së presidentit.
Mirëpo, “Rithemelimi”, që ka marrë në dorë drejtimin e demokratëve tashmë, e ka konsideruar nul çdo veprim të ish-kryetarit të grupit, të shkarkuar në kuvendin e 30 prillit.
Nisma e shumicës së konfirmuar më 6 mars, e cila bëri zgjedhje në parti për strukturat e reja drejtuese në bazë, është kundërpërgjigjur me thirrjen e këshillit të ri kombëtar nesër, në orën 18:00.
Përveç konstituimit të këtij organi, më i larti vendimmarrës në PD, do të vendoset edhe për qëndrimin karshi Edi Ramës dhe qeverisjes së majtë në procesin e zgjedhjes së presiodentit të ri.
Axhendën e mbledhjes së nesërme e ka bërë të ditur Edi Paloka, ndërsa emrat e anëtarëve fitues, pjesë e këshillit kombëtare të PD, i ka lexuar sërish një për një Albana Vokshi. Duke e “shumëzuar me zero” Alibeajn, nismën e tij, Edi Paloka nënvizoi:
“Bazuar në nenin 44, pika 5 e statutit, mbledhja duhej mbajtur 5 ditë nga thirrja e Këshillit Kombëtar, por për shkak të natyrës urgjente të çështjes, që trajtohet, Komisioni i Përkohshëm i Rithemelimit vendosi që mbledhja të mbahet nesër pasdite, pra në orën 18:00.
Këshilli Kombëtar i PD është i vetmi organ që mund të përcaktojë qëndrimin e unifikuar të PD lidhur me një çështje të rëndësishme politike, siç është ajo e zgjedhjes së Presidentit të Republikës. Këshilli Kombëtar është organi më i lartë që drejton veprimtarinë politike të PD në periudhën mes dy kuvendeve”.
