Ish-presidenti Bamir Topi, i ftuar në emisionin Top Story, ka rrëfyer detaje mbi bisedën që ka pasur me ish-Kryeministrin Sali Berisha para se të zgjidhej në pozicionin e Kreut të Shtetit.
Topi, duke sjellë në vëmendje zhvillimet e vitit 2007, tha se maxhoranca e asaj kohe e donte që në Presidencë të shkonte përfaqësuesi i tyre, pasi po i rrezikohej mandati qeverisës.
Madje, Topi ka zbuluar detaje edhe nga biseda konfidenciale me Sali Berishën në janar të 2007, i cili i kishte thënë se nuk kishte asnjë kandidaturë tjetër me të denjë për në krye të shtetit.
“Nata e 20 korrikut. Bëhet fjalë për 15 vite më parë. Mbaj mend tensionin, pritshmëria që njeriu ka, duke vlerësuar që nuk ishte vetëm halli im, por edhe maxhorancës. Shikoja një tension që i kishte përfshirë të gjithë. S’kishte rrugë tjetër veç zgjedhjeve të parakoshme.
Duhej një president mbi palët, për t’i bërë presion maxhorancës për të mos aluduar për pushtete të rëndësishme. Në rast se krijon probleme të forta, Presidenti mund të ushtrojë presion që maxhoranca e ka të vështirë dhe tërhiqet. Ky presion nuk egziston më. Gjithçka duhet analizuar në kontekstin e kohës. Zoti Nano aspirtonte të bëhej president. Di që zoti Nano e shprehu publikisht ëndrrën e tij presidenciale.
Ai iu drejtuar selisë së PS-së, ku i kërkoi Ramës kandidimin e tij. Problemi ishte nëse PS do t’i jepte mbështetje. Do kaloj në retrospektivë, isha kryetar i grupit parlamentar, s’isha në ëndërr. Ishte vetë Berisha, në një mbrëmje të janarit të vitit 2007 që në një bisedë konfidenciale, hapi bisedën e nevojës për një president të sigurtë, se ndryshe do rrezikohej mandati qeverisës. Ai më tha, duke parë mënyrën e funksionimit në Parlament, se askush më shumë se ti s’mund ta realizojë atë numër”, tha ai.
