Teksa u zbulua një draftmarrëveshje mes Ramës e Bashës për Reformën Zgjedhore, deputeti demokrat Flamur Noka tha në emisionin ‘Çim Peka Live’ në Syri Tv se ajo që ka rënë si kambanë alarmi në demokracinë shqiptare është fakti që po bëhet një lojë për të përçarë opozitën dhe synon mbajtjen në fuqi të Edi Ramës.
“Tashmë po dalin hapur pazaret dhe po dalin hapur dallaveret që luhen në kurriz të popullit shqiptar, në kurriz të opozitës dhe demokracisë. Pasi i ngulën thikën PD-së, po mundohen të zbatojnë hapin e dytë të këtij projekti.
Ndryshimi i Kodit Zgjedhor me prim 10 mandate pasi ke marrë vendime dhe ke përçarë opozitën, do të thotë që ka një skenar. Nga cila ambasadë që vjen ky shërbim, qeveria e Ramës është më kriminalja që ka ekzistuar ndonjëherë.”-tha Noka.
Demokrati Flamur Noka theksoi se pazarin Rama-Basha askush s’do ta pranojë ndërsa shtoi se PD-ja e vërtetë e Sali Berishës refuzon që vendi ynë të ngelet peng në duart e Ramës.
“Pengje dhe shërbëtorë të blerë, do marrë përgjigje jo vetëm në rrugën ligjore dhe zyrtare, por PD-ja e vërtetë do refuzojë që ky vend të ngelet peng në duart e Edi Ramës.“-deklaroi Noka.
Në darftmarrëveshje pika kryesore që bie në sy është ndryshimi i sistemit zgjedhor nga sistem proporcional rajonal, në proporcional kombëtar. Gjithashtu një tjetër pikë është ajo e sistemit të primit me +10 deputetë. Forca politike që del e para në zgjedhje, merr edhe 10 deputetë më shumë.
Sipas këtij drafti, pragu i hyrjes në Kuvend për forcën politike është 3% dhe për koalicionin, 5%. Sa i takon listës së kandidatëve, kjo draftmarrëveshje parashikon që listat të jenë të hapura dhe kandidati që merr një votë më shumë hyn në Parlament.
