Një ngjarje horror mund të konsiderohet ajo e zbuluar mëngjesin e sotëm në Korçë, ku një foshnje u gjet brenda njv valixheje, në dollapin e rrobave.
Trupi i dekompozuar i foshnjes u gjet nga Klodian Hasimllari, i cili në orët e para të sotëm denoncoi ngjarjen e rëndë në polici.
Hasimllari është paraqitur në komisariatin e Korçës rreth orës 02.00 të mëngjesit, ku ka pohuar se në dollapin që ndodhej në dhomën e gjumit, në banesën e tij, brenda një valixheje, ka gjetur trupin e foshnjes.
“Më duket se pashë një foshnjë në valixhe në shtëpi. Më vinte erë e keqe nga dhoma e gjumit, shkova kontrollova në dollapin e rrobave dhe pashë në valixhe një fëmijë. Unë kam më tepër se 1 vit që shkoj e vij nga Greqia sepse mundohem të mbaj familjen me bukë. Isha në Korçë para 5 muajsh, prandaj s’jam i sigurt nëse foshnja është e imja apo jo. Kisha 5 muaj pa ardhur në Korçë. Pyesja gruan po ajo më fliste në vetën e tretë duke përmendur emrin e saj pa e ditur që po fliste për veten. Thoshte që “M…” (emri shkurt i 40-vjeçares) ka lindur fëmijë dhe e ka futur në valixhe. Jam shumë i tronditur nga ajo që pashë”, mësohet se është dëshmia që Hasimllari ka dhënë para policisë.
Por nga raportime të tjera mësohet se Hasimllari ka qenë në Korçë para 1 muaji, për të parë bashkëshorten e tij, 40 vjeçare, e cila ka qenë e sëmurë.
Policia ka shoqëruar bashkëshorten e Hasimllarit, e cila fillimisht i është nënshtruar një seance me mjekë neuro-psikiatër, për të mësuar më shumë për gjendjen e saj mendore dhe psikike.
Ajo çfarë dihet është se nëna ka qenë nën kontrollin e mjekëve të Qendrës së Shëndetit Mendor. Mësohet se nëna e foshnjes që u gjet e dekompozuar është mjekuar pranë qendrës së shëndetit mendor.
Nga raportimet mësohet se gruaja është diagnostikuar me probleme të shëndetit mendor 3 vite më parë por nuk pranonte të mjekohej. Sipas të njëjtave burime, 40-vjeçarja vuan nga çrregullime serioze të shëndetit mendor psikotike për shkak të të cilave ajo ka humbur lidhjen me realitetin duke pohuar se fëmijën e ka lindur dikush tjetër dhe jo ajo.
Nga raportimet mësohet se 40 vjeçarja gjithashtu nuk ka pranuar të kurohet, ndërsa shtatzania e saj është pikasur në dhjetor të 2021 nga familjarët e saj, por sërisht ajo nuk është vizituar.
