Deputeti i PD, Oerd Bylykbashi në fjalën e tij në Kuvendin Kombëtar tha se partia ka të nevojshme që të projektohet lidershipi që do e çojë në fitore PD-në.
Bylykbashi: Uroj suksese, Kuvendi i 11 dhjetorit mbylli një kapitull të errët të PD dhe me statutin që miratoi çeli rrugën për këtë Kuvend. Kështu do të ndërtohet një Parti Demokratike me të gjitha vlerat e saj. Mbytja e ngadaltë, në heshtje përgjatë këtyre viteve në PD bëri që të rikthehej foltorja. Është detyra jonë që ta mbajmë të shëndetshëm imunitetin tonë demokratik.
Sot kemi detyrën të mbajmë atë që vendosëm në 11 dhjetor, demokratizimin e PD me reduktimin e pushtetit të kryetarit dhe forcimin e pushtetit të Kryesisë. Referendumi dhe primaret u japin anëtarëve pushtetin suprem.
Vetëm statuti nuk na bën demokratë, zbatimi i tij me votë dhe duke folur hapur po!
Duhet lënë pas përçarja që deshën të na impononin, nuk ka element më të mirë të bashkimit sesa kutia e votimit. Deri në shtatorin e kaluar po ecnim me sy mbyllur në një urë të rrezikshme, i hapëm sytë në kohë dhe nuk mund të lejonim që liria të kembehej me diktat.
Në 31 vite ndoshta nuk patëm demokraci perfekte por bashkë mund ta kapërcejmë këtë krizë. Kemi betejën fisnike për të rrëzuar regjimin e Edi Ramës, sot bazuar te tradita dhe vizioni duhet të projektojmë jo thjesht liderin por gjeneratën e drejtuesve.
