Prokurori publik ka dhënë detaje lidhur me ngjarjen tragjike të së martës (26 prill), kur çifti me origjinë nga Kosova u gjet i vdekur në apartamentin në Epinal të Francës. Sipas prokurorit, bashkëshorti ka akuzuar gruan për tradhti dhe kjo ka sjell zënkën e cila ka përfunduar me vrasje.
“Gruaja u vra nga burri i saj”, konfirmoi prokurori publik i Epinalit, Frédéric Nahon, pas mbledhjes së fakteve. Sipas tij, autopsia ka zbuluar disa plagë me thikë, duke përfshirë edhe plagë mbrojtëse në trupin e gruas 44-vjeçare.
Më tej thuhet se “burri e theri gruan e tij për vdekje para se të qëllonte kundër vetes, në prani të tre prej tetë fëmijëve të tyre”, tha prokurori të premten, për mediat franceze. “Gruaja u vra nga burri i saj. Ky i fundit ka përdorur të njëjtën thikë për të vrarë veten”, tha Frédéric Nahon.
“Hetimi konfirmoi se një zënkë verbale mes prindërve shpërtheu mëngjesin e së martës, ku bashkëshorti 45-vjeçar akuzoi gruan e tij për ‘gjoja pabesi’”, shtoi prokurori. Ngjarja ka ndodhur në banjën e apartamentit kur njëri nga fëmijët pasi theu derën zbuloi trupat e pajetë të prindërve.
Familja, me origjinë nga Kosova, jetonte në Francë që nga viti 2018 dhe kishte statusin e refugjatit. Çifti kishte tetë fëmijë, tre prej të cilëve ishin të rritur. Shtatë nga fëmijët jetonin ende me prindërit. Nga këta, pesë ishin të mitur dhe shkonin në shkollë.
Kronologjia e ngjarjes sipas autoriteteve në Francë:
Mëngjesin e kësaj të premteje, Prokurori Publik Frédéric Nahon iu rikthye rrethanave të tragjedisë së ndodhur të martën në rrugën “Kennedy 35” në Epinal. Policia kishte gjetur trupat e pajetë të një çifti në mëngjes herët.
Policia ka ndërhyrë në orën 09:00 të së martës së 26 prillit pas disa telefonatave në 15, AU 17 dhe 18. Kanë qenë fëmijët dhe fqinjët e çiftit që kanë dëgjuar britma brenda banesës. Trupat e pajetë të prindërve ishin shtrirë në banjë. Në vend u sekuestrua një thikë rreth 20 cm e gjatë.
Autopsitë dhe dëgjimet e dëshmitarëve bënë të mundur përcaktimin e kronologjisë së ngjarjes. Nëna u godit me thikë për vdekje në banjë nga i shoqi. Plagët vdekjeprurëse mbi kockën e klavikulës dhe dëmtimet mbrojtëse në parakrahë e konfirmojnë këtë. Bashkëshorti, i cili më pas kreu vetëvrasje, kishte disa plagë në kafaz të brinjëve, duke përfshirë një vdekjeprurëse në zemër, ndërsa thika i ishte vendosur ende në trup kur mbërriti policia.
Shërbimet e urgjencës gjetën në vend një skenë dhune të pabesueshme. Një nga tetë fëmijët, 16 vjeç, theu derën e banjës pasi dëgjoi britmat. Në atë kohë aty ishin katër fëmijë. Motra e madhe kishte dalë për të shoqëruar 2 më të vegjlit në shkollë. Kur u kthye, dëgjoi britma që vinin nga banesa. Ajo u strehua te fqinji poshtë për të kontaktuar shërbimet e urgjencës.
Familja përbëhej nga tetë fëmijë, shtatë që jetonin në apartament dhe më i madhi jetonte në Le Thillot. Pas tragjedisë, fëmijët janë marrë me shpejtësi nga zjarrfikësit dhe janë dërguar në spital për trajtim psikologjik. Të miturit do të vendosen nga Këshilli i Departamentit në pritje të veprimeve nga gjyqtari për të mitur. Asnjë familje nuk u gjet në territor, por në Belgjikë.
Fëmijët e pranishëm konfirmuan argumentin për një tradhti të supozuar. Bashkëshorti prej disa vitesh akuzonte gruan se e tradhtonte. Nëna u strehua në dhomë dhe burri i saj e ndoqi para se të mbyllte derën.
Familja me origjinë nga Kosova, ka ardhur në vitin 2018 me status refugjati. Prindërit kanë lindur në vitin 1977 dhe 1978. Vëllezërit janë 24, 22, 19, 17, 16, 13, 11 dhe 8 vjeç. Fëmijët e mitur shkollohen normalisht. Nga hetimi u zbulua një familje që nuk ka pasur kurrë marrëdhënie me policinë. Fqinjët raportojnë për një familje të zhurmshme me shtatë fëmijë që ndonjëherë debatonin. Të dy prindërit ishin të papunë.
