Jozefina Topalli është ngjitur në podiumin e Partisë Demokratike me lot në sy, duke thënë se hera e fundit që kishte qarë, kishte qenë pas humbjes së zgjedhjeve të vitit 2013.
Topalli ka shprehur pendesë që nuk mori pjesë në Kuvendin e 11 dhjetorit.
“Kur dola nga shtëpia për një moment po mendoja sikur një kuvend tjetër më parë të kisha dalë e të kisha thënë atë që unë kam thënë gjatë këtyre viteve. Po ju sot më latë pa fjalë dhe jam shumë mirënjohëse”, e nisi fjalën e saj ish-kryetarja e Kuvendit.
Mes të tjerash, Topalli u shpreh se ajo nuk është larguar asnjëherë nga Partia Demokratike.
“Ne duhet të mësohemi se partia nuk është kryetari, nuk është sigla dhe aq më pak godina. Partia është njerëzit, është fryma, janë vlerat. Sot jam më optimiste se sa kam qenë më parë. Erdha këtu si një nderim për trashëgiminë tonë. Kemi bërë shumë dhe kemi frymëzuar shqiptarët. Dikush mund të thotë që krijove lëvizjen tënde dhe ike. Jo, unë nuk kam ikur unë, ka ikur PD-ja nga demokratët. Të vërtetat kanë qenë liria ime. Kur opozita të bëhet pushtet moral, rruga jonë do jetë e qartë,” tha Topalli.
Ajo akuzoi ish-kryetarin Lulzim Basha për pazare me pushtetin.
“Pas 2013 PD hyri zyrtarisht në krizë të thellë, krizë identiteti, krizë përfaqësimi, krizë lidershipi. Në parlament deputetët bënin betejën me krimin ndërkohë udhëheqja më buzëqeshje bënte pazar me pushtetin. Në rrugë qytetarët protestonin në zyrën bashkiake të kryetarit të PD-së kishin nisur negociatat për lejet e ndërtimit. Në shtëpitë e shqiptarëve kishte nisur largimi nga puna në shtëpinë e kryetarit shtohej puna për kunatin. Vit pas viti në vend që të hapeshim u mbyllën. Në vend të gjithëpërfshirjes erdhi përjashtimi, në vend të bashkëpunimit erdhi përjashtimi”.
