Ministri i Brendshëm Bledi Çuçi është pyetur sot nga gazetarët lidhur me efektet që mund të ketë në ekonomi legalizimi i kanabisit për qëllime mjekësore.
Çuçi shprehu se për këtë pasojë do të bazohen në eksperiencën që kanë vendet e OECD lidhur me këtë çështje.
“90% e vendeve e OECD e kanë legalizuar. Këto vende me standard perëndimor e kanë të legalizuar jo vetëm për qëllime mjekësore e industrial por dhe për qëllime rekreative. Prandaj nuk ka nevojë për studim të thelluar në këtë pikë kur çdo vend perëndimor, po themi, tashmë e kanë të legalizuar dhe dihet ndikimi në ekonomi të kultivimit dhe përpunimit të kanabisit për qëllime mjekësore dhe industrial”.
Ministri nuk nguroi të shprehë edhe vëmendjen e veçantë që do të kenë strukturat e rendit që të mos ketë asnjë abuzim me mënyrat si do të mbillet kjo bimë.
“Do ta bëjmë me ligj të posaçëm që do të përcaktojë rregulla strikte për mënyrën si do mbillet. Licenca dhe bashkëpunimi me vende apo kompani të tjera të njohura që operoinë në këtë luftë. Disiplinimi me ligj do të jetë shumë strikt dhe nuk do ketë të bëjë fare me hapësirë për çdo kënd që do të mbjell kanabis”.
