Aktivistja e LGBTI+, Xheni Karaj, e ftuar në emisionin “Jeto me Orën”, ka rrëfyer emocionet e jetës së saj, teksa kujton kohën kur ka folur hapur për herë të parë. Ajo rrëfeu se nëse nuk do ta kishte bërë edhe mund të mos ishte më në jetë pasi e mendonte shpeshher♪7 edhe vetëvrasjen.
“Nëse nuk do flisja hapur, e kam të vështirë ta mendoj si do isha, por me siguri jo e lumtur, madje mendoj se nuk do isha gjallë. E mendoja shumë vetëvrasjen. Aktivizmi më ka shpëtuar jetën. Më ka dhënë emocione, dashuri, empati nga njerëz të komunitetit, guxim, më ka mësuar shumë, më ka rritur si njeri. Më ka frymëzuar. Ka momente se edhe pse i them vetes se jam e fortë, ka momente që të shënjojnë. E pashë këtë në debatin e çështjes “prindi 1, prindi 2”. Nuk kisha hasur kurrë një gjuhë urrejtjeje si në ato dy muaj.
Media duhet të ketë kujdes në narrativën që zhvillojnë. Kam qenë viktimë e dhunës fizike. Personat e komunitetit të LGBT-së, janë viktima të dhunës. Personat transgjinorë për shembull kanë rënë pre e dhunës. Ka pasur raste kur policia nuk i ka identifikuar dhunuesit”- tha ajo.
