Gjykata e Tiranës ka lënë në burg babë e bir, Sami e Kevin Qordja, në banesën e të cilëve u kapën 48.5 kg kanabis çokollatë dhe një sasi heroine.
Babë e bir do qëndrojnë në qeli të paktën deri në përfundim të hetimeve. Ndaj tyre janë ngritur akuzat për veprat penale “Prodhimi dhe shitja e narkotikëve”, dhe “Trafikimi i drogës”, kryer në bashkëpunim. Gjatë operacionit ku u konstatuan lëndët narkotike, fillimisht u kontrollua një banesë në rrugën “Rexhep Tarja” ku gjetën 160 pako kanabis çokollatë me peshë totale 48.5 kilogramë.
Referuar hetimeve, babë e bir ushtronin veprimtarinë kriminale në fushën e kultivimit dhe prodhimit të narkotikëve, duke e përpunuar lëndën narkotike kanabis në formë çokollate, të cilën më pas e shisnin në zona të ndryshme të Tiranës. Po nga hetimet ka rezultuar se shtetasit e lartpëmedur merreshin edhe me shitjen e lëndës narkotike heroinë, në doza, të cilat i shisnin kryesisht në zonën e Tufinës, në Babrru dhe në rrugën “Myslym Keta”.
Dyshohet se në bashkëpunim me persona të tjerë, ata siguronin lëndë narkotike heroinë, në sasi 1-2 kg, e ndanin në doza dhe më pas e shisnin në këtë zonë.
Policia kontrolloi shtëpinë e 31-vjeçarit Ramazan Qordja në zonën e Tujanit ku u gjetën 312 gramë heroinë, një armë gjahu dhe peshore elektronike. Hetimet janë ende në vijim për identifikimin e personave të tjere në këtë veprimtari kriminale.
