Projektligji për menaxhimin e parkut kombëtar të Butrintit u kthye në temë diskutimi në seancën e sotme parlamentare, edhe pse nuk ishte në rendin e ditës. Opozita akuzoi se qeveria synon të shkatërrojë parkun kombëtar për qëllime përfitimi, ndërsa mazhoranca mohoi akuza.
Deputetja demokrate Ina Zhupa, nga foltorja e parlamentit, tha se qeveria ka vendosur që ta trajtojë si mall tregtar trashëgiminë e mbrojtur nga UNESCO. Ajo parashikoi se qeveria do ta shkatërrojë parkun, që cilësohet si një nga zonat më të rëndësishme të trashëgimisë sonë kulturore, arkeologjike, mjedisore dhe turistike të vendit.
Zhupa tha se Butrinti do të jepet me koncesion, ndërsa shtoi se projekti parashikon që në parkun kombëtar të ndërtohen bare, restorante dhe kinema. “…Një minierë ari duke shfrytëzuar pasurinë tonë natyrore, duke kaluar në të ardhura të paktën 50 milionë euro në arkën e një fondacioni privat. E dini qesharaken? Na premton të na japë 0.5% për buxhetin e shtetit e do e rrisë atë deri në 2 %. Ftoj qytetarët të informohen të reagojmë bashkë na mbështesni në këtë kauzë se Butrinti nuk është mall tregtar”, tha Zhupa.
Ministrja e Kulturës Elva Margariti tha se parku s’po jepet me koncesion, ndërsa shtoi se projekti synon mirëmnaxhimin.
Për çështjen foli edhe kryeministri Edi Rama, i cili lëshoi akuza ndaj opozitës: “Parku do të bëhet siç themi, ju vazhdoni të flisni, por parku do të bëhet siç themi ne, sepse ne e dimë se çfarë bëjmë. Ju nuk dini çfarë flisni“.
Gjithsesi, as Rama dhe as ministrja nuk hodhën dritë mbi kontratën për menaxhimin e parkut të Butrintit mes Ministrisë së Kulturës dhe Fondit Shqiptaro-Amerikan për Zhvillim, AADF.
Gjatë mbledhjes së një komisioni parlamentar më herët, ministrja Margariti ka deklaruar se marrëveshja për Butrintin ishte klasifikuar si sekret dhe nuk i ishte vënë në dispozicion Parlamentit, bashkë me projektligjin për miratimin e saj.
