Arens Çela pritet të emërohet drejtues i përkohshëm i Prokurorisë së Tiranës, pas shkarkimit nga KPA të Elisabeta Imerajt.
Këshilli i Lartë i Prokurorisë do të mblidhet këtë Premte për caktimin e drejtuesit të ri të prokurorisë.
Në rendin e ditës së mbledhjes së thirrur me urgjencë nga kreu i KLP-së Alfred Balla është diskutimi e miratimi i projekt–aktit për ndërprerjen e komandimit të prokurorit Arens Çela, i komanduar në Prokurorinë e Përgjithshme dhe kthimin e tij në Prokurorinë pranë Gjykatës së Shkallës së Parë Tiranë, ku ka emërimin si prokuror.
Po ashtu, do të diskutohet e votohet projekt–akti për caktimin e përkohshëm të prokurorit Arens Çela, në detyrën e Drejtuesit të Prokurorisë pranë Gjykatës së Shkallës së Parë Tiranë.
Në rendin e ditës është dhe diskutimi e miratimi i projekt–aktit për hapjen e garës për pozicionin e Drejtuesit të Prokurorisë pranë Gjykatës së Shkallës së Parë Tiranë.
Arens Çela përfundoi studimet në Shkollën e Magjistraturës në vitin 2006 dhe u emërua prokuror në Prokurorinë e Lushnjes. Më pas, Çela ka drejtuar prokurorinë e Beratit dhe atë të Lushnjes si dhe ka mbajtur pozicionin e zv.drejtuesit të Prokurorisë së Krimeve të Rënda. Në janar 2020, Çela u komandua nga Këshilli i Lartë i Prokurorisë si ndihmës-magjistrat në Prokurorinë e Përgjithshme.
