Ish-Kryeministri Sali Berisha, gjatë një takimi me pedagogët, tha se në vitin 2005 kishte 12 studentë për 1000 banorë, shumë larg mesatares së vendeve të BE.
Berisha tha se u bë një përpjekje e madhe për ta vendosur shkollimin dhe arsimin në epiqendër të shoqërisë dhe ekzekutivit.
Ish-Kryeministri Sali Berisha akuzoi Qeverinë Rama se ndëshkoi arsimin, duke shtuar se ligji i arsimit të lartë ishte një sponsorizim mafioz i Henri Çilit te Edi Rama.
“I ka bërë vendit një dëm të pallogaritshëm dhe këtë e bëri duke korruptuar atë që i pranoi ligjin. Fatkeqësisht edhe opozita shqiptare për të njëjtat arsye nuk e kundërshtoi atë me forcë. Çfarë bëri ky ligj? Ndëshkoi të varfërit në aspektin e arsimimit”, tha Berisha.
Ai tha se me këtë ligj është marrë dy vite me gjithë pasionin e një ish-pedagogu dhe konstatova se ai nuk mund të aplikohej ashtu siç ishte.
“Ligji u shndërrua në një shpatë për të përjashtuar me mijëra të rinj nga mundësia për të vijuar Universitetet”, tha Berisha.
Në vijim të atakimit të ligjit për arsimit të lartë, Berisha tha se u ndërprenë doktoraturat në Universitetet shtetërore, ndërsa vijonin te ato private. Gjithashtu, sipas tij, ky ligj bëri që të rriteshin tarifat në Universitete.
