Deputeti i PS-së Arben Pëllumbi tha se diskutimi kryesor sot në mbledhjen e Kryesisë së mazhorancës ishte lidhur me procesin e zgjedhjes së Presidentit të ardhshëm të vendit.
I ftuar në studion e ‘Fax News’, Pëllumbi theksoi se e rëndësishme në këtë fazë është të respektohet procesi dhe kushtetuta, duke theksuar se opozita duhet të bashkëpunojë për përcaktimin e kalendarit.
Ai tha ndër të tjera se presidenti do të jetë figurë që përfaqëson unitetin dhe të ardhmen e Shqipërisë dhe se PS nuk do negociojë asnjëherë me persona non-grata si Sali Berisha.
Pjesë nga studio:
-Sapo përfundoi mbledhja e kryesisë, çfarë është diskutuar sot?
Pëllumbi: Diskutohen cështjet e brendshme të partisë dhe natyrisht mbetet aty, Rama thuajse ceku të gjitha cështjet me të cilat u morëm sot, vazhdimi i vendimeve të kongresit të fundit dhe zgjedhja e kryetarëve në 61 bashkitë. Pjesa tjetër kishte të bënte me procesin e zgjedhjes së presidentit.
-Ju keni propozuar 3 emra?
Pëllumbi: Pjesa më e madhe e deputetëve ka propozuar emra, janë rreth 67 emra të propozuar nga grupi parlamentar, dhe në respekt të kushtetutës duhet që në 3 raundet e para të gjejmë konsensus. Duhet respektuar procesi, në bashkëpunim me forcat opozitare, kemi nisur një lloj diskutimi me grupet.
Opozita ka kërkuar shtyrje afati, ne thamë datën 29 prill por thamë që me 4 maj do të mblidhet konferenca e kryetarëve që do përcaktojë kalendarin e procesit të zgjedhjes së presidentit.
Hapi i parë është procesi, seancat janë të posaçme, Kuvendi duhet të mblidhet në mënyrë specifike. PS brenda vetes së vet po përgatitet për emrat që do diskutojë me opozitën, po nuk pati konsensus do e zgjedhim përmes votave.
Janë 3 grupe parlamentare të opozitës, kemi përjashtuar bashkëpunimin me Berishën sepse është non grata dhe pjesë e së shkuarës, presidenti do të ketë lidhje vetëm me të ardhmen e Shqipërisë.
Unë nuk e di si ne mund të bindim ndryshe opozitën apo të gjithë skeptikët, ne kemi qenë të hapur për diskutime. Nëse nuk paraqitesh që në këtë fazë do të thotë se nuk do të bashkëpunosh. Presidenti nuk duhet të përfundoje si opozitar në 2025 por të jetë figurë e unitetit.
