Kategoria Superiore do luajë të premte dhe të shtunë javën e 31. Në fushë do zbresin 10 ekipet, teksa kalendari ka rezervuar edhe derbin mes Partizanit dhe Dinamos.
Dueli merr jetë të premte në 19:45 dhe zhvillohet në “Elbasan Arena“, paçka dëshirës së tifozëve që ndeshja të luhet në kryeqytet. Për këtë duel, trajneri i Demave ka kthyer në ekip Kristi Koten.
Mesfushori korçar për disa muaj nuk ka qenë pjesë e ekipit, duke u dërguar edhe te skuadra e të rinjve. Trajneri Mehmeti s’i ka dhënë hapësira 23 vjeçarit, që ka luajtur vetëm 12 ndeshje këtë sezon.
Lojtari është rikthyer në stërvitje me ekipin e parë dhe do jetë Mehmeti ai që do vendosë nëse do grumbullojë lojtarin në ndeshjen derbi me Dinamon. Kontrata e Kotes me Demat skadon këtë verë.
