Trajneri i Liverpool-it Jurgen Klopp deklaroi se Juventusi dhe Bajerni i Mynihut mund ta kenë nënvlerësuar Villarealin, por skuadra e tij nuk do ta bëjë të njëjtin gabim. Të dyja ekipet përballen në “Anfield Road” në takimin e parë gjysmëfinal të Ligës së Kampioneve.
Skuadra spanjolle ka qenë surpriza e kompeticionit në këtë sezon dhe gjendet për herë të parë në 16 vite në këtë raund. Tekniku gjerman vlerësoi edhe kolegun e tij Unai Emeri për punën e bërë te Villareali.
“Kam parë ndeshjet e Villarealit dhe paraqitja e tyre është mbresëlënëse. Unai duket si një nga ata trajnerët e fiksuar pas detajeve, që përgatitet për situata të ndryshme në një ndeshje, e kjo është ajo çfarë ekipi i tij po bën. Shumë punë e mirë. Mënyra të ndryshme të modulit, të të bërit presing, e mënyra të ndryshme reagimi në rrethana specifike. Unai ka bërë punë të një cilësie të lartë. Është speciale të jesh në gjysmëfinalen e Ligës së Kampioneve. Do ta shijojmë. Kemi një kundërshtar të vështirë”.
Liverpooli arriti në këtë fazë të kompeticionit tri vite më parë kundër Barcelonës dhe mesfushori Jordan Henderson tha se tifozët, të cilët luajtën një rol kyç në rekuperimin e disavantazhit 3-0 pas takimit të parë, do të jenë thelbësorë.
“Të kuqtë” kanë shansin që të fitojnë katër tituj në këtë sezon, pasi kanë bërë të tyren Lig Kap dhe janë në gjysmëfinalen e FA Kap, ndërsa kryesojnë renditjen me 1 pikë më shumë se sa Mançester Siti, ndërsa kanë ngelur dhe pesë ndeshje.
