Raste të shumta të hepatitit akut te fëmijët janë raportuar në Evropë gjatë ditëve të fundit, tha në një deklaratë Qendra Evropiane për Parandalimin dhe Kontrollin e Sëmundjeve (ECDC).
Mbretëria e Bashkuar ishte e para që raportoi këtë çështje. Sipas, Organizatës Botërore të Shëndetësisë, 169 të mitur nga një muaj deri në 16 vjeç janë zbuluar në 12 vende të botës. Profesoresha Silva Bino, gjatë një komunikimi të Komitetit të Ekspertëve me mediet bëri me dije se në Shqipëri nuk ka sinjalizime për këtë hepatit.
”Për sa i përket këtij hepatiti ne e kemi marrë njoftimin ka 3 javë dhe ky komunikim është transmetuar me gjithë strukturat. Ne nuk kemi të dhëna në vendin tonë, rastet më të shumta janë në SHBA dhe Mbretërinë e Bashkuar, atje ku është shfaqur fillimisht. Kemi një survejancë sindromike që monitoron çdo lloj zverdhje të sklerave në vend dhe nëse kemi rritje ne ndërhyjmë. Deri tani nuk ka asnjë lloj shenje. Instituti është në gjendje të bëjë identifikimin e adenovirusit”
Shenjat janë të vjella, diarre, anoreksi, këputje dhe zverdhje e lëkurës. Që në fillimet kur ka turbullime të traktit tretës të cilat nuk qetësohen, duhet të drejtohen te mjekët përkatës.
