Një 40-vjeçar në shtetin e Ioua në SHBA, fitoi 1 mln dollarë në një lotari, kjo falë “gabimit” të shitësit në dyqanin ku bleu biletën.
Sipas CNN, Josh Buster nga Uest Burlington, kërkoi një biletë me 5 kombinime të ndryshme. Por shitësi printoi një biletë me 1 kombinim, dhe një biletë tjetër me 4 kombinime.
Në një prononcim për mediat pasi fitoi lotarinë, Buster u shpreh se nuk e besonte që fitoi dhe se gjithçka ishte një gabim sistemi.
“Unë zakonisht nuk kam fat, kështu që mendova se do ishte ndonjë gabim në sistem. Pasi mora mesazhin, u futa në faqen online të lotarisë që të sigurohesha se kombinimi i numrave ishte i saktë, dhe pikërisht ashtu ishte. Tani pres që nga momenti në moment të zgjohem nga kjo ëndërr” – tha 40-vjeçari.
Buster tregon se paratë do t’i përdorë për të paguar makinën e tij, kredinë që ka marrë e ëma, ndërsa një pjesë tjetër do t’i ruajë për moshën e pensionit.
“Kjo do të më ndihmojë të heqë disa barra nga jeta ime. Nuk do të kem më probleme financiare” – u shpreh ai.
Sipas faqes online të “Lottery’s Mega Millions”, shansi që të fitohet çmimi prej 1 mln dollarësh është 1/12 607 306.
