Piloti holandez i Red Bull, Max Verstappen, fitoi sot pasdite “garën sprint” të zhvilluar në pistën italiane të Imola.
Kampioni i botës në Formula 1 arriti të triumfojë falë një parakalimi që i bëri kryesuesit të këtij botërori, Charles Leclerc me Ferrari, dy xhiro nga fundi. Kjo ishte gara e parë sprint e këtij sezoni. Nga kjo “mini garë” Verstappen ka siguaruar 8 pikë në luftën për titullin kampion.
Monogasku i Ferrarit u rendit i dyti, ndërsa i treti u klasifikua Sergio Perez me makinën tjetër Red Bull. I katërti doli Carlos Sainz me makinën tjetër Ferrari, ndërkohë që pikë në këtë “garë sprint” marrin 8 pilotët e parë.
Zhgënjen sërish makina Mercedes, në vendet 11 dhe 14, respektivisht me George Russell dhe Lewis Hamilton, larg më të mirëve dhe jashtë zonës së pikëve. Të dielën do të zhvillohet gara “normale”, me 63 xhiro dhe pilotët do të renditen në start në bazë ët klasifikimit në garën e sotme sprint.
