Jose Mourinho ka pranuar superioritetin e kundërshtarit pas humbjes 3-1 të pësuar kundër Inter-ti në San Siro, në javën e 34-të të kampionatit italian.
“Ata janë shumë të fortë, më të fortët e kampionatit”, ka thënë trajneri i verdhekuqve në intervistën e dhënë pas ndeshjes për DAZN.
“Kanë shumë lojtarë që janë ‘kafshë’ në aspektin fizik. Për t’i mundur duhet të jesh perfekt, ne nuk kemi qenë të tillë sot”, ka vazhduar Special One.
Në lidhje me luftën për titull në Serinë A, portugezi nuk ka asnjë dyshim: “Unë e dua Inter-in dhe ata më duan mua, do të më pëlqente që ta fitonin kampionatin, tani mund ta them, para ndeshjes unë doja vetëm të fitoja”.
Inter kryeson renditjen e kampionatit italian me 72 pikë, një më shumë se Milan-i i vendit të dytë që do të luajë nesër në mbrëmje kundër Lazio-s. Megjithatë, zikaltrit kanë një ndeshje për të rikuperuar me Bologna-n.
