Ivi Kaso e quajti të paligjshëm vendimin e sotëm të gjyqtares së Tiranës Blerina Muça, e cila pranoi ankimin e Enkelejd Alibeajt.
Më 25 mars, gjyqtari i Tiranës Agron Zhukri njohu Kuvendin e zhvilluar në “Air Albania” që vendosi shkarkimin e Bashës si kryetar i PD dhe marrjen e drejtimit të partisë nga “Komisioni i Rithemelimit”. Enkelejd Alibeaj ankimoi vendimin dhe këtë të Premte, gjyqtarja e gjykatës së Tiranës Blerina Muça vendosi pranimin e këtij ankimi.
Por, çfarë do të thotë ky vendim? Ivi Kaso, anëtar dhe përfaqësues ligjor i Komisionit të Rithemelimit, shpjegoi se “është pranuar vetëm mundësia që ankimi i paraqitur nga një palë që pretendon se përfaqëson PD (Enkelejd Alibeaj) të bëhet pjesë e dosjes dhe të shkojë në apel”.
Vendimin, ai e cilësoi të jashtëligjshëm dhe absurd dhe renditi argumentat.
“Dhe kjo siç e kishin paralajmëruar në kundërshtim me ligjin, faktet, provat që gjenden në dosjen gjyqësore. Mbi të gjitha me dhjetëra qëndrime që ka mbajtur vetë gjykata e Tiranës në raste analoge dhe po e njëjta gjyqtare edhe në rast e shqyrtimit të problematikave të regjistrimit të PD”, tha Kaso në një konferencë për mediat nga selia blu.
Ai shtoi se asnjë entitet s’mund të pretendojë se përfaqëson PD-në dhe aq më tepër të ushtrojë ankim. Alibeaj, vijoi ai, s’është palë sipas parashikimeve ligjore.
Ai paralajmëroi ankim të vendimit pas zbardhjes së tij edhe pse shtoi se “vendimi në mënyrë absurde parashikon sikur është i paankimueshëm”.
“Unë besoj vetëm që një hall i madh mund ta shtyjë dikë të dalë kundër vetes së vet”, tha Kaso, duke iu referuar gjyqtares Blerina Muça.
