Presidenti Ilir Meta, përmes një mesazhi, i ka uruar shërim të shpejtë ish-kreut të shtetit, Bujar Nishani, i cili ndodhet në spital pas komplikimeve shëndetësore të shkaktuara nga COVID.
“I uroj nga zemra shërim të shpejtë dhe shëndet të plotë Presidentit Bujar Nishani dhe lutem për kthim sa më parë pranë familjes së tij dhe në krye të angazhimeve të rëndësishme”, thuhet në mesazhin e Metës.
Nishani u paraqit në Sanatorium me shenja pneumonie në të dyja mushkëritë për shkak të kalimit të koronavirusit, i cili kishte lënë pasoja të tjera shëndetësore.
Burime bëjnë me dije se Nishani ka patur fibrozë post-Covid, të cilat i kanë shkaktuar ulje të nivelit të oksigjenit në gjak si edhe parametra të tjera problematikë duke bërë të domosdoshme dërgimin e tij jashtë.
Koronavirusi ka lënë shumë persona me pasoja të tjera në mushkëri duke bërë që të detyrohen të rikthehen në spital. I tillë duket të jetë edhe rasti i ish-presidentit Nishani.
