Fqinjët e familjes Qorri ku për pak ndodhi një tragjedi kanë treguar tmerrin që kanë përjetuar kur kanë parë djalin Albanin, që të merrte hanxharin e t’i sulej të atit duke e kërcënuar se do ta vriste.
Sipas një fqinjeje, i gjithë sherri ka nisur pas një diskutimi për serat. Gruaja e moshuar shton se Aleks Qorri, babai i Albanit ishte në gjendje të dehur, e se për këtë arsye debati mes tyre ka agravuar.
“Babai i tij ishte në klub, kishte pirë, vjen pastaj dhe i thotë djali ‘o babi ke hapur sërën’ ‘çfarë sere’ i thotë ai. Më pas dëgjuam zhurma, ishte super tapë ai. Më pas mori sëpatën djali dhe iu ul, më shumë për ta trembur e frikësuar babanë,”– thotë gruaja në fjalë.
Ngjarja e rëndë ndodhi një ditë më parë në Krutje të Lushnjes. 56-vjeçari Aleks Qorri telefonoi policinë dhe kërkoi ndihmë. Efektivët mbërritën në shtëpinë e familjes Qorri, por i riu kur i ka parë u ka kërkuar të largoheshin, në të kundërt do t’i dëmtonte ata dhe veten. I riu u vu në pranga e tashmë do të përballet me akuzat për veprat penale “Dhuna në familje” dhe “Mbajtja pa leje e armëve të ftohta”.
