Faqe të ndryshme në rrjetet sociale po reklamojnë kartëmonedha të falsifikuara.
Në një video të postuar së fundmi në “Tik Tok”, shihet se si një prej këtyre faqeve ofron shitjen e eurove të falsifikuara në prerje të ndryshme. Madje, faqja në fjalë reklamon produktin e jashtëligjshëm duke ofruar 20 përqind zbritje apo siguron se nuk dallohen nga makineritë në pikat e këmbimit valutor dhe kanë “super cilësi”. “Paguaj 200 euro dhe merr 1000 euro fallco”, është një tjetër ofertë me të cilën shitësit synojnë të joshin blerësit.
Falsifikimi i kartëmonedhave përbën vepër penale dhe siç parashikohet në Nenin 183 të Kodit Penal: “Falsifikimi ose vënia në qarkullim e monedhave të falsifikuara dënohet me burgim gjer në pesë vjet. Po kjo vepër, kur kryhet në bashkëpunim, më shumë se një herë ose ka sjellë pasoja të rënda, dënohet me burgim nga pesë gjer në pesëmbëdhjetë vjet”.
Megjithatë, në një vend si ky i yni ku situata ekonomike për shumë familje sa vjen e përkeqësohet, vlen të konsiderohet aksioma: varfëria sjell rritjen e kriminalitetit. Kështu, shumë të rinj (që janë dhe përdoruesit dërrmues të rrjetit social në fjalë), të demoralizuar nga kushtet ekonomike, apo nën adrenalinën e fitimit të shpejtë, bëhen pre të mundshme të trafikantëve të kartëmonedhave të falsifikuara.
Nga ana tjetër, edhe pse prej kohësh qarkullojmë postime të tilla në rrjete sociale, nga policia nuk duket të ketë ndonjë reagim. Të paktën zyrtarisht, kohët e fundit, policia nuk ka njoftuar të ketë goditur ndonjë rast të veprimtarisë së personave që shesin kartëmonedha të falsifikuara në rrjetet sociale.
