Skuadra e Ferrarit po dominon këtë sezon të Formula 1, duke fituar dy nga tri garat e zhvilluara. Ndërkohë që, ajo që po zhgënjen është makina Mercedes, që pas dominimit në 7 vitet e fundit, tani e sheh veten në vështirësi. Shefi i makinës gjermane, Toto Wolff, u shpreh se nuk e priste një rikuperim kaq të madh të Ferrarit, që nga problemet e mëdha të 2020-ës, tani kryeson botërorin.
“E përgëzoj Ferrarin për hapin e madh që ka bërë. Po asistojmë në rikuperimin më të madh që një makinë mund të bëjë në historinë e Formula 1, krahasuar me një vit më parë. Para një viti ishin 14-15 kuaj fuqi pas nesh, sot janë ata që kanë këtë epërsi ndaj Mercedes. Nuk kam parë kurrë më parë një progres kaq të madh në një kohë kaq të shkurtër. Mund të ëndërrojnë titullin këtë sezon”, tha Wolff.
Duke folur për të ardhmen, shefi i Mercedes shton: “Janë disa aspekte që mund të përmirësojmë me kalimin e kohës. Ndërkohë që, janë disa detaje të makinës që ende nuk i njohim mirë. Nga studimet dhe simulimet që kemi bërë kuptojmë se makina mund të jetë 1 sekondë më e shpejtë nga ajo që shohim aktualisht në pistë”.
