Ish-drejtori i Policisë së Vlorës, Jaeld Çela ka bërë rekurs në Gjykatën e Lartë për prishjen e vendimit që e dënoi për shpërdorim detyre.
Çela u lirua pak kohë më parë, pasi vuajti shumicën e dënimit me 3.4 vite burg.
Ish-kreu i Policisë së Vlorës ishte pjesë e dosjes, ku u dënua ish-ministri i Brendshëm, Saimir Tahiri. Çela u vu në hetim nga prokuroria në nëntor 2017 dhe për tre vite qëndroi në arrati. Ai u dorëzua në maj të vitit 2020.
Prokuroria e akuzoi Çelën se në bashkëpunim me Tahirin ndihmonin bandën e Habilajve për të trafikuar drogë.
Në deklaratën e tij pas dorëzimit, Çela theksoi se është i pafajshëm teksa këmbëngul se nuk i njeh anëtarët e bandës së Habilajve.
Ai shprehet se në dosjet e çështjes emri i tij nuk përmendet në asnjë përgjim apo komunikim mes të dyshuarve.
Gjykata e Shkallës së Parë e Krimeve të Rënda e dënoi me 3 vite e 4 muaj burg vetëm për shpërdorim detyre.
