Ish-kryeministri Sali Berisha deklaroi nga foltorja e Kuvendit këtë të Enjte se Edi Ramën e ka kapur psikoza e vdekjes.
“Psikoza e vdekjes e kap njeriun kur ai ka kryer krime, që tejkalojnë në dëmet e tyre edhe vrasjen. Psikoza e vdekjes e kap njeriun kur bashkëpunëtorët e tij ndodhen në biruca dhe e thërrasin: Eja te ne. Psikoza e vdekjes e kap njeriun kur e di se është kapur në flagrancë duke vjedhur mandatet në këtë parlament dhe votën e shqiptarëve. Ai përfytyron natën me hënë masa njerëzish që mendon se do i rezervojnë fatin e të atit shpirtëror si 30 vite më parë. Psikoza e vdekjes e kap njeriun që vjedh dhe është i tmerruar nga ato që ka vjedhur. Për të gjitha këto i them se je i pashpresë dhe i garantoj se opozita do i garantojë vdekjen politike, jo atë biologjike,” tha Berisha.
Më herët gjatë fjalës së tij në Kuvend, Rama e quajti Berishën “i vdekur”.
