Ish-Kryeministri Sali Berisha u shpreh mbrëmjen e sotme se në Partinë Demokratike ka dy grupime, njëri që po tenton të krijojë një parti, dhe grupimi tjetër është ai që në 6 mars morri 69 % të votave.
“Lulzim Basha del qytet më qytet dhe thotë do krijoj parti të re. Unë nuk e them se ai nuk e bën dot, por uroj që ata të qëndrojnë në PD. Basha sot është deputet, por edhe anëtar i Këshillit Kombëtar”, tha Berisha.
Ai tha se njerëzit e parë që u takua në selinë e PD ishin Enkelejd Alibeaj dhe Gazment Bardhi.
“I thashe që Lulzim Basha mori përgjegjësitë për zhvillimet pas 9 shtatorit, ndaj ia kërkova që të arkivojmë ndarjen. Më thanë, Basha iku, tërhiqu edhe ju. Këtë skemë ma kishin thënë më parë të tjerë”, tha Berisha. Ai shtoi se s´ka pasur në mendje të rikthehet si kryetar i PD, megjithëse në 2018, Donald Lu ia kishte kërkuar rikthimin përmes një personi.
“Nëse shikoni të gjitha këto që ndodhin, arsyeja është se nuk donin që Shqipëria të kishte një opozitë të vërtetë”, tha Berisha.
