Ish-Kryeministri Sali Berisha tha mbërmjen e sotme se nuk mund të shtyhej procesi i zgjedhjeve në PD dhe thirrja e Kuvendit më 30 prill, pasi vendi do të mbetej pa opozitë.
Berisha tha se kjo ishte arsyeja pse nuk u pranua propozimi i disa deputetëve për ndërprerjen e procesit të zgjedhjeve në parti.
“Nuk do të kishte më opozitë ua garantoj këtë nëse do të ndalnim procesin. Unë e kam thënë se kudo ku ka problematika dhe zgjedhje jo në përputhje me statutin, procesi do të rishikohet”, tha Berisha.
Ish-Kryeministri tha se procesi i riorganizimit të PD ka nisur me 12 dhjetor dhe Kuvendi i 30 prillit do t´i japë partisë institucionet.
“Do ngremë institucionet dhe do të funksionojmë si opozitë. Sali Berisha nuk ka frikë nga asgjë, ndaj dhe nuk po nxitohemi nga frika, por nga fakti se rrezikojmë të mos kemi opozitë”, tha Berisha.
Sipas tij, çfarë do që të bëj Berisha apo kushdo tjetër, ne nuk mund të ndalojmë askënd të krijojë parti, dhe kjo po ndodh me disa brenda PD.
