Komisioneri Shtetëror i Zgjedhjeve, Ilirjan Celibashi, ka zhvilluar një bashkëbisedim me gazetarët këtë të mërkurë lidhur me zgjedhjet e pjesshme të 6 Marsit.
Celibashi u pyet në lidhje me Partinë Demokratike dhe se cili autoritet e udhëheq atë tani. Sipas Komisionerit, përgjigjen e ka gjykata, ndërsa shtoi se KQZ nuk e ka tagrin tani për të thënë se kush drejton PD.
“Këtë do ta themi se sot nuk mund ta themi sa kohë nuk kemi një nevojë për të konfrontuar dokumentacionin e partive politike. Kur ta kemi do ta bëjmë me dije këtë. Informacioni në lidhje me këtë çështje mund të merret në gjykatën e rrethit gjyqësor Tiranë, i cili është i vetmi institucion i cili tregon se kush është organi drejtues i një partie të caktuar politike. Mund të themi kush ka qenë në zgjedhjet e 6 Marsit, por sot nuk e themi dot dhe nuk kemi asnjë tagër për ta thënë”, tha Celibashi.
Sipas KQZ, në zgjedhjet e 6 Marsit janë 47 raste të dyshimta për votim të dyfishtë.
Komisioneri Celibvashi u shpreh më tej se pjesëmarrja ka qenë rreth 30% dhe numri më i lartë i votuesve ishte në moshën 55-64 vjeç.
Celibashi po ashtu deklaroi se nuk ka ambicje për postin e Presidentit.
