Personi në foto është 30-vjeçari Elis Suçi, i shpallur në kërkim për grabitjen e filialit të postës së Kamzës, pasditen e të hënës. I veshur me xhup portokalli, me kapele të bardhë, maskë anti-Covid dhe një qese në dorë, i riu shfaqet në kamerat e sigurisë së bizneseve duke u larguar pas grabitjes së 100 mijë lekëve.
Menjëherë pas tij u nisën forcat e policisë, për të bërë të mundur arrestimin, por mundën të kapin vetëm bashkëpunëtorin e tij, 20-vjeçarin Algert Kurti. Ky i fundit është pikasur nga kamerat dhe pretendon se po qëndronte para gjimnazit të Kamzës dhe se Elisin e ka gjetur pranë postës duke vëzhguar lëvizjet e punonjësve. Kur kishte shkuar ta takonte, Elisi sipas tij, i kishte thënë që do të grabisnin postën, por ai ka mohuar të ketë marrë para.
30-vjeçari Elis Suçi, ndodhej në kërkim për vjedhje dhe kjo nuk e ka penguar të grabisë nën kërcënimin e armës pikën e postës shqiptare në Kamëz. Elis Suçi, i dënuar më parë për vjedhje ishte në kërkim, pasi në muajin Mars qëlloi me armë në drejtim të policisë në afërsi të shkollës në Kamëz, teksa këto të fundit po shkonin që ta arrestonin. Suçi kërkohet edhe për vjedhjen e dy lokaleve, një marketi dhe një laboratori mjekësor.
