Ndoshta ndodhet në momentin e tij më të mirë në karrierë dhe për ta mbyllur më mirë sezonin, i mungon vetëm një trofe. Pier Kalulu ka bërë të mos ndihet mungesa e Kjaerit, Romanjolit, Kalabria dhe Hernadezit të cilët luajnë në role të ndryshme, por janë zëvendësuar denjësisht. Meritë e Piolit, por edhe e familjes siç ka treguar francezi në një intervistë.
Si ka ndikuar familja në ecurinë tuaj?
Java për mua nis të premten ose të shtunën kur shoh ndeshjet e vëllezërve të mi. Ndonjëherë ndiej më shumë trysni për ta sesa për veten. Prindërit vuajnë shumë në ndeshjet tona dhe luten që të na ecë mbarë. Jam rritur në një familje të madhe dhe jemi shumë të lidhur me njëri-tjetrin. Futbolli është një pasion familjar. Doja të bëhesha si vëllezërit, ndërsa babai mundohej të na ndiqte të gjithëve.
Si ndodhi zbarkimi te kuqezinjtë?
Gjithçka u realizua shumë shpejt dhe isha i shtangur. Kishte disa klube që më donin, por Maldini nuk refuzohet. Erdha në skuadër si mbrojtës i djathtë, por roli për mua nuk ka rëndësi për sa kohë jam pjesë e formacionit.
Cilat janë aspektet që jeni përmirësuar në dy vitet e Milanit?
Në personalitet jam rritur, pavarësisht se nuk jam nga ata tipa që e vuaj trysninë apo emocionet. Jam përmirësuar në përqendrim sepse e kam kuptuar se ky është sekreti.
Pioli për çfarë ju qorton më së shumti?
Ai më ka qëndruar pranë gjithmonë duke më ndihmuar shumë në aspektin personal. Nuk isha as 20 vjeç kur erdha në skuadër, por ai më besoi e më dha mundësinë të tregoja veten. Edhe Kesi me Benaserin më kanë ndihmuar shumë. Me ata fola përpara se të pranoja Milanin, ndërsa përshtatjen ma kanë bërë të lehtë të gjithë, sidomos Leao me Salmakersin.
Çfarë do të thotë për ju fanella kuqezi?
Që jam pjesë e Milanit e se duhet të punoj shumë. Kur erdha te Milani, ishte pandemia dhe përveç selisë dhe qendrës stërvitore nuk kam pasur mundësi të vizitoja gjë tjetër. Impakti i parë me botën “Milan” ka qenë impresionues.
Cilat janë cilësitë më të mira të skuadrës?
Jemi punëtorë dhe kemi shumë dëshirë. Cilësia nuk mungon dhe jemi rritur të gjithë paralelisht. Nuk ka egoizëm e të gjithë janë në dispozicion të cilitdo që ka nevojë për ndihmë.
Goli ndaj Empolit mban Milanin në garën për titull…
Jam i lumtur, por gola kanë shënuar të gjithë e po me aq vlerë. Mua më vjen mirë sepse shënova në stadiumin tonë, pavarësisht se disa shokë më vunë në lojë sepse shënova me këmbën “e keqe”.
Si është raporti juaj me Maldinin?
Është gjithmonë pranë nesh e nuk na i kursen këshillat. Për mua veçanërisht, është një figurë e rëndësishme sepse përbën një shpërblim të madh për të gjitha sforcot që kam bërë në jetë.
Një koment të fundit për derbin e Kupës?
Do të jetë e vështirë dhe detajet do të bëjnë diferencën. Jemi gati e duhet të mbrojmë mirë sepse Xheko me Lautaron janë më të fortët e një skuadre shumë të rrezikshme.
