Që pas largimit të Lorenc Trashit, skuadra e Partizanit nuk po gjen qetësi në krahun e majtë të mbrojtjes. Trajneri Dritan Mehmeti është munduar të gjejë lojtarin ideal për atë pozicion, por deri tani nuk ia ka dalë. Herë Andi Hadroji e herë Eljon Sota, kanë qenë futbollistët e përzgjedhur nga tekniku kryeqytetas.
Megjithatë oshilacionet janë të dukshme. Kësisoj po pritet fundi i sezonit për të bërë llogaritë se ku duhet ndërhyrë. E rëndësishme për 16-herë kampionët e vendit është kapja e Europës, që sezoni mos të konsiderohet i dështuar. Aktualisht të kuqtë gjenden në vendin e katërt të Abissnet Superiore me 42 pikë, 3 më pak se Kukësi i vendit të tretë.
Priten me interes javët e fundit të këtij edicioni futbollistik që për Partizanin tanimë të gjitha konsiderohen finale. Kujtojmë që në linjën e majtë të mbrojtes, të kuqtë kishin para një sezoni një lojtar si Lorenc Trashi. Më i miri i kampionatit shqiptar, gramshioti bëri progres në performancat e tij dhe katapultoi duke u transferuar te Al Qadsia.
