“Duam që të bëjmë një komunikim sot me ju për më shumë detaje për procesin e saponisur të zgjedhjes së Presidentit të Republikës, Kur flas për proces në fakt janë dy procese, procesi i parë është ai Kushtetues, që sikurse jeni vënë në dijeni ne kemi inicuar kërkesën për fillimin e këtij procesi Kushtetues në datën 29 Prill.
Arsyeja është shumë e thjeshtë, sepse duam t’i lëmë më shumë kohë procesit konsultues se sa procesit kushtetues. Procesi Kushtetues fillon me mbajtjen e konferencës…”
Në 60 sekondat e para të konferencës, Taulant Balla e përmendi 8 herë fjalën “proces”. Kakofonia nuk është rastësi. Përkundrazi! E nxorrën para gazetarëve për të përtypur disa procese të organizuara paralelisht për emrin e presidentit të ri. Të gjitha duken si farsa. T’i marrim me radhë.
Pseudoprocesi i parë:
Të martën, deputetëve socialistë do t’u shpërndahet një zarf dhe një formular, ku secili do të ketë mundësi të shkruajë emrat e tre kandidatëve që mendon se janë të denjë për president. Se sa i dëgjon Rama deputetët e tij, tashmë dihet. Që kjo është një tallje, kuptohet që nga fakti se nxjerrja e emrave do të bëhet në mënyrë të fshehtë dhe se nuk dihet nëse rezultati do të publikohet apo jo.
“Për ne ka rëndësi të kemi një proces brenda për brenda grupit parlamentar” u shpreh Taulant Balla, ndërsa vazhdoi me shpalosjen e “procesit” të dytë.
Pseudoprocesi i dytë:
Ky i dyti ka të bëjë me negociatat me opozitën. Kontaktet do të bllokohen me njerëzit e Berishës dhe me ata të Metës, pasi as Komisioni i Rithemelimit dhe as LSI nuk kanë grup parlamentar. Ftesa do t’i dërgohet Enkelejd Alibeajt nga PD, Mesila Dodës dhe Fatmir Mehdiut për disa takime paraprake në zyrat e Kuvendit. “Kushtetuta parashikon një proces” tha Balla duke folur për komunikimin me opozitën. Dihet tani se asnjë prej emrave të thirrur nuk përfaqëson shumicën e një opozite të bërë copash. “Do të flasim me copat dhe çikat e opozitës” ka ironizuar Edi Rama më herët, i qetë se asnjë copë apo çikë nuk e vë dot në presion për zgjedhjen e kreut të ri të shtetit.
Pseudoprocesi i tretë:
Një adresë emaili e grupit parlamentar të Partisë Socialiste, [email protected] do të sherbejë si kuti votimi për popullin. Seriozisht, socialistët e kanë quajtur edhe këtë një proces. “Populli nuk mund të përjashtohet nga e drejta për të sjellë propozime” tha Balla, në konferencë me gazetarët. Se si dhe kush do t’i numërojë votat e “popullit” me email mbetet një mister. Pavarësisht se Kushtetuta parashikon që presidenti të zgjidhet nga parlamenti dhe jo nga populli, Taulant Balla e quajti këtë një standard i ri për t’u ndarë nga kulisat e vjetra për konsultimet e kryetarit të shtetit.
Pseudoprocesi i katërt
Në nevojën urgjente për procese, nuk mund të lihej jashtë lojës edhe shoqëria civile. Taulant Balla tha se do të ketë ftesa për shoqërinë civile, që të bëhen propozime për emrin e ri të kreut të shtetit. Mbetet për t’u parë se kush nga shoqëria civile do të bëhet pjesë e kësaj farse, megjithëse në raste të tilla, të pavarurit e fasadave dhe fondeve qeveritare asnjëherë nuk mungojnë.
Pse i duhet “procesi” socialistëve për presidentin e ri
Por pse duhen organizuar procese, konsultime dhe votime për t’i folur liderit, që socialistët e krahasojnë herë me Zeusin dhe herë me Skënderbeun? Pse kjo dëshirë për votime, nga partia që eleminoi votën për kryetarin? Çfarë po kërkon të fshehë Edi Rama?
Qëllimi është të krijohet ideja se presidenti i ri do të jetë produkt i një procesi. Jo zgjedhja personale e Edi Ramës, që pasi ka kapur të gjitha pushtetet, mezi pret t’i djegë etapat, për të emëruar në krye të presidencës ushtarin ose ushtaren e radhës.
Por mbivendosja e proceseve po degradon në tallje. Sepse gjasat janë që Rama e ka ndarë mendjen për emrin që do caktojë në krye të shtetit. Pikërisht kjo duhet fshehur. Fakti që ai emrin e presidentit e ka. Tani i duhet një proces./Lapsi.al
