Një vajzë 20-vjeçare është nxjerrë e vdekur mbrëmjen e së shtunës nga policia greke pas incidentit të të shtënave në një varkë me emigrantë të paligjshëm që ndodhi në lumin Evros, pranë Souflit.
Mediat helene bëjnë me dije se e reja ishte me prejardhje afrikane dhe sipas ekzaminimeve ajo është qëlluar me armë zjarri nga distanca në gjoks. Mbrëmjen e së shtunës, një varkë me gjithsej 11 persona ka nisur të kalojë nga pala turke për në atë greke.
Patrulla greke që ndodhej në zonë ka lokalizuar emigrantët e parregullt me një aparat termik dhe ka tentuar t’i pengojë ata të kalojnë në anën greke duke përdorur sinjale drite dhe zanore.
Të shtëna janë qëlluar nga pala turke, ndoshta nga pjesëtarë të ushtrisë turke. Kur anija me emigrantët mbërriti në anën greke, u konstatua se në bord ndodheshin vetëm pesë persona, ndërsa një grua u gjet e vdekur në ujë.
