Njëmbëdhjetë ditë më parë, Boldnews.al publikoi një video që tregonte tentativën e dështuar të një personi për të këmbyer para false në një pikë këmbimi valutor në Tiranë. Këtë të Hënë, policia njoftoi arrestimin e tij bashkë me dy bashkëpunëtorët.
Në pranga, për veprën penale “Falsifikimi i monedhave” kryer në bashkëpunim, u vunë:
- Viard Kotori, 29 vjeç, banues në Tiranë,
- Etmond Dokushi, 32 vjeç, banues në Rrogozhinë,
- Ervin Kamolli, 32 vjeç, banues në Rrogozhinë.
“Këta shtetas, në bashkëpunim me njëri-tjetrin, dyshohet kanë hedhur në qarkullim nëpër subjekte të ndryshme tregtare, në Tiranë dhe në qytete të tjera, kartëmonedha të prerjes 50 dollar”, thuhet në njoftimin e policisë, që shton se hetimet vijojnë “për dokumentimin e plotë të veprimtarisë kriminale të këtyre shtetasve”.
VDEO
Në pamjet e siguruara nga Boldnews.al, shihen momentet kur një nga tre të arrestuarit e aksionit policor të koduar “50 Dollars”, tenton të këmbejë para falso. Por, punonjësja e pikës së këmbimit valutor në kryeqytet zbulon se paratë janë të falsifikuara. Pas një diskutimi mes të dyve, punonjësja paralajmëron se do të njoftojë policinë. Pas kësaj, tjetri largohet duke lënë paratë e falsifikuara në duart e punonjëses.
Punonjësja e pikës së këmbimit pasi merr paratë: Ku shkon me këto?
I arrestuari: Si ku shkoj?
Punonjësja: Janë fallco të gjitha.
I arrestuari: Kush janë fallco?
Punonjësja: Këto!
I arrestuari: Je mirë?
Punonjësja: Ti sjell fallco në zyrën time dhe më thua mua a jam mirë unë, apo të lajmëroj policinë dhe e zgjidhim kush është mirë ti apo unë?!
I arrestuari: Ato janë marrë nga banka.
Punonjësja: Këto janë marrë nga banka, ok ja e verifikojmë të marr unë shefin në telefon dhe e verifikojmë.
… (Është e paqartë fjalia e shqiptuar nga i arrestuari)
Punonjësja: Jo se ti po thua që unë s’jam mirë. Pse i sjell në zyrë këto fallso? (Numëron kartëmonedhat).
I arrestuari largohet.
