Chelsea-Liverpool, 14 maj “Wembley”. Trofeu i dytë më i rëndësishëm i futbollit anglez do të vendoset në duelin mes dy skuadrave të treshes së parë në Angli. Blutë e Londrës u përgjigjën me një provë force në derbin e kryeqytetit kundër Crystal Palace të Vieira që në vitin 2022 po bënte një sezon spektakolar me vetëm dy humbje.
Mjaftuan golat e Loftus-Cheek dhe Mason Mount në pjesën e dytë që Thomas Tuchel të fshinte zhgënjimin e eleminimit nga Champions League dhe për të shkuar drejt fundit të një sezoni që mund të konsiderohet i suksesshëm për klubin kampion Europe.
Blutë dominuan në pjesën më të madhe të ndeshjes duke treguar edhe forcë karakteri në “Wembley” ku përballë do të kenë skuadrën e Klopp rreth një muaj më vonë në epilogun e një sezoni të komplikuar, të shoqëruar edhe nga problemet në klub për shkak të sanksioneve ndaj ish-presidentit Roman Abramovich.
