Të tjera detaje raportohen lidhur me dhunimin e kancelarit të Gjykatës së Elbasanit, Ledio Sulkuqi.
Nga raportimet mësohet se një nga dy autorët e ngjarjes së rëndë të 10 prillit është identifikuar si Usama Gashi, 24 vjeç nga Elbasani, ndërkohë nuk dihet se kush ishte ‘shoku’ i tij që e ndihmoi.
Policia dyshon se dhuna ndaj kancelarit lidhet me punën e tij në gjykatën e këtij qyteti. 24 vjeçari, tashmë i shpallur në kërkim, dyshohet se e ka ndërmarrë sulmin ndaj kancelarit, për llogari të një tjetër personi.
Gashi nuk është një emër i panjohur për Policinë pasi ai është përfshirë edhe në një përplasje me shkopinj bejsbolli mes dy grupeve të rinj në lagjen e ‘Kinezëve’ në Elbasan, ngjarja kjo e regjistruar në 30 qershor 2020.
I gjithë sherri nisi pasi Amarildo Mema dhe Usama Gashi, nga shokë u kthyen në armiq të përbetuar. Në 30 qershor 2018, Usama Gashi denoncoi në Polici Amarildo Memën dhe Margit Llapushin, për akuzën e ‘Kanosjes’, por çështja u pushua.
Usama Gashi, gjithashtu në nëntor 2017 ka kallëzuar në prokurorinë e Elbasanit, edhe Ambri Sinakollin, nip i familjes ‘Çapja’ në Elbasan, por për të njëjtën akuzë, por edhe kjo dosje iu pushua. Megjithatë Gashi nuk i ndali denoncimin.
Nga raportimet mësohet se më 20 korrik 2019, Gashi kallëzoi Elvis Koçi (Caushllari), i cili njihet ndryshe edhe si ‘Vis Korçari’, po ashtu duke u shprehur se e kishte kërcënuar me armë zjarri, por edhe ky hetim është pushuar nga Prokuroria e Elbasanit.
