Mjeku pneumolog Arben Tanka tha për emisionin “Fast Check” në “Euronews Albania”, se në Shqipëri ka raste të pacientëve që kanë simptoma të covidit edhe pas 3 muajsh. Këto pacientë konsiderohen si pacient long covid.
“Ka raste në Shqipëri. Pjesa më e madhe e pacientëve që vijnë te ne, ankohen për një lodhje të theksuar dhe kanë problem me memorien. Ka dhe pacientë të cilët kanë pagjumësi dhe probleme me ankthin”, tha ai.
Nëse një pacient pas ditës së 21-të të shfaqjes së simptomave kryen një tampon RT PCR dhe rezulton negativ, konsiderohet pacient post covid sipas mjekut.
Tanka u shpreh se në pjesën më të madhe të rasteve, organi më i prekur është mushkëria, sidomos te pacientët të cilët kanë qenë të intubuar dhe kanë pasur probleme me frymëmarrjen.
Ai nënvizoi se çdo organ i prekur nga Covid-19 duhet të trajtohet me preparate të ndryshme dhe apeloi qytetarët që t’i drejtohen fillimisht mjekut të familjes nëse kanë shqetësime të tilla.
