Gjatë ditës së sotme u raportua mbi një aksion të policisë së Tiranës për zbulimin e një baze të kodimit të celularëve për komunikime të pagjurmueshme.
Madje u raportua se telefona të tillë punojnë të koduar me internet pa karta SIM. Nga raportimet, baza e gjetur në Tiranë është në rruga “Mahmut Fortuzi” dhe është zbuluar pas 4 muaj hetimesh.
Si rezultat i operacionit, është sekuestruar serveri i kodimit që gjendej brenda një prej serviseve të Tiranës që e ofronin këtë shërbim në këmbim të shumave monetare.
Në hetim është një teknik 35- vjeçar, banues në Tiranë, me origjinë nga Saranda. Policia në njoftimin e saj nuk jep shumë detaje, ndërsa ndaj personit nën hetim janë ngritur akuza për tregtim mallrash kontrabandë, fshehje të të ardhurave, mos pagim taksash.
“Specialistët e Sektorit për Hetimin e Krimit Ekonomik dhe Financiar proceduan penalisht shtetasin D. R., 35 vjeç, për veprat penale “Tregtimi dhe transportimi i mallrave që janë kontrabandë”, “Shitja e paautorizuar e kartave sim”, “Fshehja e të ardhurave”, “Mospagimi i taksave dhe tatimeve”, dhe “Shkelja e të drejtave të pronësisë industriale”.
Gjatë kontrollit të ushtruar në subjektin e këtij shtetasi, shërbimet e Policisë, kanë gjetur dhe sekuestruar në cilësinë e provës materiale, 8 aparate celulare të ndryshëm, për të cilat nuk dispononte faturë tatimore, të dyshuar kontrabandë. Materialet i kaluan Prokurorisë pranë Gjykatës së Rrethit Gjyqësor Tiranë, për veprime të mëtejshme procedurale”, njofton policia.
Për herë të parë për telefonat që punonin pa kartë ka folur ish-Kryeministri Sali Berisha, i cili në deklaratat publike është shprehur se këta telefonata janë përdorur nga grupet kriminale, por edhe qeveritarët. Madje në vijim të denoncimit, Berisha u shpreh se rreth 30 prokurorë europianë kanë ardhur në Tiranë për të hetuar pikërisht mbi çështjen në fjalë.
