Mediat e rëndësishme botërore kanë shkruar në lidhje me sulmin ndaj makinës së Policisë së Kosovës në veri.
Agjencia e lajmeve Reuters shkruan se sulmi ka ndodhur në kufirin ndërmjet Kosovës e Serbisë, aty ku tensionet etnike kanë qenë thuajse përherë të pranishme.
Agjencia citon një zyrtar policor të Kosovës, i cili ka deklaruar se janë duke e hetuar sulmin e sotëm nëse lidhet me aktivitetet e kontrabandës apo me tensionet mes Kosovës e Serbisë.
Edhe disa media europiane, si “Euraktiv” kanë raportuar incidentin e ndodhur.
Mëngjesin e sotëm në afërsi të Zubin Potokut, patrulla e policisë kufitare është sulmuar me armë zjarri kallashnikov dhe granatë dore teksa po bënin ndërrimin e kolegëve të tyre.
Në patrullat e policisë kanë qenë policë nga dy etni, serbë dhe shqiptarë.
Sulmin ndaj policisë së Kosovës e kanë dënuar ambasada amerikane, Zyra e BE-së në Kosovë, KFOR-i, qeveria dhe presidenca. Po ashtu, sulmi u dënua edhe nga presidenti i Shqipërisë, Ilir Meta.
