Media gjermane “Spiegel” zbulon një sherr që kryeministri Edi Rama ka pasur me ekuipazhin e një fluturimi të Lufthansa-s në Dhjetor të vitit të shkuar, para se të nisej nga Gjermania për në SHBA.
“Spiegel” shpjegon se Rama bëri një gjullurdi aq të madhe duke kundërshtuar mbajtjen e maskës kundër Covid, sa që stafi i avionit lajmëroi policinë.
“Kryeministri shqiptar Edi Rama shkaktoi një skandal në bordin e avionit të Lufthansa gjatë valës së katërt të koronës. Sipas pasagjerëve, kreu i qeverisë refuzoi aq ashpër mbajtjen e maskës mbrojtëse mjekësore nga korona në fillim të dhjetorit përpara nisjes së një avioni nga Frankfurt në Detroit, saqë ekuipazhi i avionit duhej të thërriste kapitenin për ndihmë. Megjithatë, duke qenë se ai gjithashtu nuk ishte në gjendje të bindte kreun e qeverisë shqiptare për detyrimin e përgjithshëm për të mbajtur një maskë FFP2 ose një maskë kirurgjikale në vend të një maskë pëlhure, Rama u shoqërua nga policia”, raporton këtë të Premte “Spiegel”.
“Vetëm pasi u bindi nga një punonjës i Ministrisë së Jashtme i thirrur me ngut, Rama më në fund pranoi të zbatonte rregulloret e parashikuara për koronan, si të gjithë pasagjerët e tjerë në bordin e Lufthansa. Linja ajrore më pas e ricaktoi atë dhe delegacionin e tij prej dhjetë anëtarësh në një linjë tjetër me Shtetet e Bashkuara. Shefi i Lufthansa-s, Carsten Spohr e përmendi së fundmi incidentin në një intervistë në Spiegel. Edhe pse shefi i linjës ajrore nuk përmendi emrin e Ramas, ai theksoi se nuk kishte asnjë trajtim preferencial kur bëhej fjalë për kërkesën për maskë – as për një kryetar qeverie”, raporton më tej gazeta gjermane në versionin online.
