Shkëlqim Koçeku, 37 vjeç i arrestuar ditën e sotme nga Policia e Tiranës për rastin e një pengmarrje të ndodhur në kryeqytet nuk është një emër i panjohur për blutë e kryeqytetit.
Shkëlqim (Rasim) Koçeku është prangosur nga ana e Policisë së Tiranës pasi akuzohet se së bashku me dy persona të tjerë ka marrë peng Ermal Sorrën, me pretendimin se i kishte para borxh një gruaje.
Denalda Çezma dhe Shkëlqim Koçeku, edhe pse ky i fundit ishte në “arrest shtëpie”, së bashku me të shpallurin në kërkim, Sulltan Piraci, kishin marrë peng Ermal Sorrën.
Por kush është Koçeku, personi me dy emra, i cili duhet të vuate dënimin në shtëpi por në fakt kishte dalë për të marrë peng një person, madje edhe e ka torturuar?
Në janar të këtij viti, ai u prangos, pasi me vete kur kishte dalë nga banesa kishte dhe marrë me vete edhe armën tip “kallashnikov”.
Pamja e të riut në Paskuqan me armë në dorë ka ngjallur kureshtje edhe tek banorët e tjerë të zonës, të cilët kanë dalë nga kafeja me telefon në dorë dhe filmonin skenën.
I vetmi që i afrohet është një burrë që bisedon me 37-vjeçarin, por nuk dihet marrëdhënia e tij me të prangosurin tashmë nga Policia e Shtetit. Madje dhe as shkaku se përse i riu kishte marrë armën në dorë e kishte dalë “shëtitje” në lagje.
Efektivët e Komisariatit numër 5 në Tiranë në atë kohë, shkuan në Paskuqan vetëm pasi morën njoftimin se një person qarkullonte me armë zjarri në mes të rrugës.
Gjatë kontrolleve në banesën e 37-vjeçarit është gjetur arma e zjarrit tip “kallshnikov”, e cila ishte hedhur në oborrin e banesës së tij.
Ndërsa vetë Koçekut iu vendosën prangat, pasi mbi të rëndonin veprat penale “armëmbajtje pa leje” dhe “kanosje”. Por mesa duket në vend se të ishte në burg, ai kishte dalë për të vuajtur dënimin në banesë, por vetëm aty nuk rrinte.
