Një mbledhje e Komisionit të Rithemelimit pritet të zhvillohet pasditen e sotme në selinë e PD. Nga raportimet mësohet se mbledhja pritet të nisë në orën 19:00, ndërsa ajo pason atë të Grupit Parlamentar, ku u debatua lidhur me procesin e bashkimit të demokratëve.
Një ditë më parë, në mbledhjen e Grupit Parlamentar, ish-Kryeministri Sali Berisha deklaroi se Enkelejd Alibeaj nuk ka më mbështetjen e Komisionit të Rithemelimit për të vijuar mbajtjen e funksionit të kryetarit të grupit. Berisha e lidhi këtë qëndrim me faktin se Alibeaj kishte ankimuar pa asnjë të drejtë ligjore vendimin e Gjykatës së Tiranës, sipas të cilit njiheshin vendimet dhe ndryshimet statutore të Kuvendit të 11 dhjetorit.
Po dje në mbledhjen e Grupit Parlamentar u kërkua ndërprerja e procesit të zgjedhjeve të brendshme në parti, sikundër u propozua mbajtja e një Kuvendi Kombëtar pajtimi.
Berisha deklaroi se propozimet ishin racionale dhe do të shqyrtoheshin, atje ku ka pasur parregullsi zgjedhjesh, procesi edhe mund të rikthehej, ose të mbikqyrej lidhur me çdo pretendim.
Nuk dihet ende se çfarë vendimesh pritet të marrë Komisioni i Rithemelimit, pra nëse do të ketë një stopim të procesit të zgjedhjeve të brendshme apo një shtyrje të Kuvendit të 30 prillit, i cili sipas deklarimeve do të duhet të zgjedhë Këshillin Kombëtar të PD, prej të cilit do të zgjidhet edhe Kryesia e re, por edhe nënkryetarët dhe sekretariati.
