Një i ri është shpallur në kërkim nga policia e Tiranës, pasi akuzohet se ka qëlluar me armë zjarri në drejtim të një 35-vjeçari në vazhdën e një sherri. Nga të shtënat nuk ka të lënduar.
Policia njoftoi këtë të Martë se ngjarja ka ndodhur në zonën e Kombinatit dhe të shtënat erdhën pas një konflikti për motive të dobëta mes dy personave.
“Specialistët për Hetimin e Krimeve në Komisariatin e Policisë Nr. 6 kanë referuar materialet në Prokurori dhe po punojnë për kapjen e shtetasit Emra Korteshi, 28 vjeç, banues në Kombinat, i cili pas një konflikti për motive të dobëta, në Kombinat, dyshohet se ka qëlluar me armë zjarri në drejtim të shtetasit Endrit Ismailaj, 35 vjeç. Materialet i kaluan Prokurorisë pranë Gjykatës së Rrethit Gjyqësor Tiranë, për veprime të mëtejshme procedurale”, thuhet në njoftimin e policisë.
