Nazmi Bandula u vra me armë zjarri këtë të Martë në Shkodër, në lagjen “Partizani”.
Krimi ndodhi rreth orës 08:15. Duke iu referuar dëshmive të para nga vendngjarja, burime pranë grupit hetimor bëjnë me dije se 55-vjeçari ishte duke pirë kafe në një lokal pranë banesës.
Sipas të njëjtave burime, nga një makinë është qëlluar me breshëri në drejtim të Nazmi Bandulës, duke e lënë të vdekur. Mjeti, tip “Benz” i bardhë me xhama të zinj, më pas është larguar.
Bandula ka qenë në kafe me një tjetër person, i cili u ka shpëtuar plumbave bashkë me punonjësin e lokalit, të cilët kanë dëshmuar në Polici lidhur me ngjarjen.
Policia ka rrethuar zonën dhe vijon krehja e saj, me qëllim kapjen e autorit.
Nga ana tjetër, grupi hetimor ndodhet në vendngjarje dhe një hetim ka nisur për zbardhjen e krimit.
